didaktika

Lankide baten gomendioa ekarriko dut gaur. Cuadernos Cervantes aldizkarian argitaratutako artikulua. El error en el proceso de aprendizaje.

Erroreen trataera "modernoari" zelan oratu apur bat galduta gabiltza oraindino. Artikuluak jarraibideak, informazioa eta hausnartzeko galderak ere eskaintzen dizkigu. 

Ikaskuntza kooperatiboa eta kolaboratiboa hezkuntza munduan gero eta gehiago entzuten diren kontzeptuak dira.

Gure jardunean ohikoa izaten da ikastalde batekin lan egitea, eta gero eta ohikoagoa izaten da ikastaldeen hetereogeneitatrean gaineko kezka. Maila, interes eta trebezia desberdinetako ikasleak ditugu taldean, eta gure jardunbide normalean (errutina esango luke Plisti-plastak) zailtasunak aurkitzen ditugu aniztasun horri aurre egiteko.

Ikaskuntza kooperatiboan edo kolaboratiboan (kontzeptu desberdinak ei dira) arzo horiei oratzeko bideak topatu ditzakegu, eta kontzeptu eta praktika horietan hasteko De estranjis blogean sarreratxoa eta erreferentzia intersgarriak eman dizkigute Aprendizaje Cooperativo: cómo empezar artikuluan. 

Edozelan ere, sarean erreferentzia asko aurkituko dituzue bilatzaileren batean terminoak jarriz gero.

Edo honen moduko aurkezpenak 

Bizikleten irudia hemendik atera dugu.

Hizkunea soziolinguistika aldizkari elektronikoan maiatzean agertu zen Mondragon Unibertsitateko Maria Pilar Sagasta Errasti eta Matilde Sainz Osinagak sinatutako artikulua.

HUHEZIko eleaniztasun-gaitasuna garatzeko plangintzaren barruan ikasleen artean hizkuntza ikastearen inguruko gogoeta eta eztabaida sustatzeko lanaren eta haren emaitzen berri ematen digute. Ikasleen ideiak eta iritziak besteak beste.

Lanaren ondorio eta emaitza modura aipu hau:

Emaitzek frogatzen dutenez, gure ikasleen eleaniztasun-trebezia hobeki ulertu ahal izan dezagun, gogoetan oinarrituriko ikaskuntza-irakaskuntza prozesua jarri behar da martxan. Hausnartze praktika horri esker jakin dezakegu gure ikasleek zer sinismen eta irudikapen duten hizkuntzen ikaskuntza-irakaskuntzaz. Hala bada, hezkuntza alorrean esku-hartze eraginkorragoa planifikatu ahal izateko aukerak ahalbidetzen dira.

Hizkuntza eta ikastearen gaineko gogoeta irakaslearen (edo superdidaktikariaren) esku uzteko joera edukitzen dugu. Gure planteamenduek sarri ikaslearen ideia eta pertzepzioekin egiten dute talka. Ondorioetan dioten bezala, ikaslearen begiradari ere erreparatu egin behar zaio.

Artikulu ona honetaz hausnartzeko, eta hausnarketa bera abian ipintzeko.

Centro Virtual Cervantes-eko Didactired atalean Mario Gómez del Estalek "Contra los profesores de español" lau artikuluko sorta idatzi zuen duela urtebete luze.

Izenburua artikuluetan topatuko duguna baino gogorragoa da duda barik. Gramatikaren lanketarako behar dugun ikuspegi pragmatiko-komunikatiboaz hausnarketa proposatzen du del Estalek, ariketa eta adibideekin hornitua.

• Contra los profesores de español (I)
• Contra los profesores de español (II)
• Contra los profesores de español (III)
• Contra los profesores de español (IV)

Predikatzen duguna (ikuspegi komunikatiboa) gramatikaren lanketarekin oraindik ere kostatzen zaigu uztartzea. Hausnarketa gaztelaniari begirakoa da baina gurerako ere jarraibide bat baino gehiago emango digu.

Galdera honen atzetik dagoena gustatu zait:

Mekanografia ondo dakizu, ezta? Orduan, zerrendatuko dituzu orain eta dudatu barik teklatuko beheko lerroko letrak?

Jose Luis Cabellok Madriletik gidatzen duen "Laboratorio de idiomas en Secundaria" blogean didaktikari buruzko artikulu interesgarriak plazaratzen ditu lantzean behin. Hizkuntzen irakaskuntza eta teknologiaren aplikazioa izaten du idazgai nagusi, baina planteamendu didaktiko-pedagogikoetan sakontzeko joera dauka, teknologia kontuetan baino areago.

Honela bada, ¿Constructivismo conductista? artikulu honetan konduktismoak hizkuntzak ikasteko aplikazio batzuetan zer eragin daukan eta, aldi berean, konstruktibismoaren korronte batzuek ekar ditzaketen aportazioez dihardu.

Labur, gehiegi akaso, baina konstruktibismo-konduktismo gerra (?) horretan kokatzen hasteko abiapuntua izan daiteke.